Srinivasa Suprabhatam: Venkateswara Suprabhatam Full Text

Venkateswara Suprabhatam text and transliteration

This is the Sri Venkateswara Suprabhatam as it appears in Diya's prayer library: 257 lines covering the Suprabhatam, Stotram, Prapatti, and Mangalashasanam, each paired with its transliteration. To read and listen, see Govinda Namalu lyrics with meaning. For more, see Lord Venkateswara: Who He Is, With the Venkateswara Stotram.

Original	Transliteration
सुप्रभातम् प्रपत्ति मङ्गलाशासनं स्तोत्रं सहितम्	Suprabhaatam prapatti manggalaashaasanam stotram sahitam
॥ श्रीः ॥	|| shreeh ||
अथ श्रीवेङ्कटेशसुप्रभातम्।	Atha shreevengkateshasuprabhaatam|
कौसल्या सुप्रजा राम पूर्वा सन्ध्या प्रवर्तते ।	Kausalyaa suprajaa raama poorvaa sandhyaa pravartate |
उत्तिष्ठ नरशार्दूल कर्तव्यं दैवमाह्निकम्॥ १॥	Uttishtha narashaardoola kartavyam daivamaahnikam|| 1||
उत्तिष्ठोत्तिष्ठ गोविन्द उत्तिष्ठ गरुडध्वज ।	Uttishthottishtha govinda uttishtha garudadhvaja |
उत्तिष्ठ कमलाकान्त त्रैलोक्यं मङ्गलं कुरु ॥ २॥	Uttishtha kamalaakaanta trailokyam manggalam kuru || 2||
मातस्समस्तजगतां मधुकैटभारेः	Maatassamastajagataam madhukaitabhaareh
वक्षोविहारिणि मनोहरदिव्यमूर्ते ।	Vakshovihaarini manoharadivyamoorte |
श्रीस्वामिनि श्रितजन प्रियदानशीले	Shreesvaamini shritajana priyadaanasheele
श्रीवेङ्कटेशदयिते तव सुप्रभातम्॥ ३॥	Shreevengkateshadayite tava suprabhaatam|| 3||
तव सुप्रभातमरविन्दलोचने	Tava suprabhaatamaravindalochane
भवतु प्रसन्नमुखचन्द्रमण्डले ।	Bhavatu prasannamukhachandramandale |
विधिशङ्करेन्द्रवनिताभिरर्चिते	Vidhishangkarendravanitaabhirarchite
वृषशैलनाथदयिते दयानिधे ॥ ४॥	Vrishashailanaathadayite dayaanidhe || 4||
अत्र्यादि सप्तऋषयस्समुपास्य सन्ध्यां	Atryaadi saptarishayassamupaasya sandhyaam
आकाशसिन्धुकमलानि मनोहराणि ।	Aakaashasindhukamalaani manoharaani |
आदाय पादयुगमर्चयितुं प्रपन्नाः	Aadaaya paadayugamarchayitum prapannaah
शेषाद्रिशेखरविभो तव सुप्रभातम्॥ ५॥	Sheshaadrishekharavibho tava suprabhaatam|| 5||
पञ्चाननाब्जभवषण्मुखवासवाद्याः	Panychaananaabjabhavashanmukhavaasavaadyaah
त्रैविक्रमादिचरितं विबुधाः स्तुवन्ति ।	Traivikramaadicharitam vibudhaah stuvanti |
भाषापतिः पठति वासरशुद्धिमारात्	Bhaashaapatih pathati vaasarashuddhimaaraat
शेषाद्रिशेखरविभो तव सुप्रभातम्॥ ६॥	Sheshaadrishekharavibho tava suprabhaatam|| 6||
ईषत्प्रफुल्लसरसीरुहनारिकेल-	Eeshatpraphullasaraseeruhanaarikela-
पूगद्रुमादि सुमनोहरपालिकानाम्।	Poogadrumaadi sumanoharapaalikaanaam|
आवाति मन्दमनिलस्सह दिव्यगन्धैः	Aavaati mandamanilassaha divyagandhaih
शेषाद्रिशेखरविभो तव सुप्रभातम्॥ ७॥	Sheshaadrishekharavibho tava suprabhaatam|| 7||
उन्मील्य नेत्रयुगमुत्तमपञ्जरस्थाः	Unmeelya netrayugamuttamapanyjarasthaah
पात्रावशिष्टकदलीफलपायसानि ।	Paatraavashishtakadaleephalapaayasaani |
भुक्त्वा सलीलमथ केलिशुकाः पठन्ति	Bhuktvaa saleelamatha kelishukaah pathanti
शेषाद्रिशेखरविभो तव सुप्रभातम्॥ ८॥	Sheshaadrishekharavibho tava suprabhaatam|| 8||
तन्त्रीप्रहर्षमधुरस्वनया विपञ्च्या	Tantreepraharshamadhurasvanayaa vipanychyaa
गायत्यनन्तचरितं तव नारदोऽपि ।	Gaayatyanantacharitam tava naarado'pi |
भाषासमग्रमसकृत्करचाररम्यं	Bhaashaasamagramasakritkarachaararamyam
शेषाद्रिशेखरविभो तव सुप्रभातम्॥ ९॥	Sheshaadrishekharavibho tava suprabhaatam|| 9||
भृङ्गावली च मकरन्दरसानुविद्ध-	Bhringgaavalee cha makarandarasaanuviddha-
झङ्कारगीतनिनदैः सह सेवनाय ।	Jhangkaarageetaninadaih saha sevanaaya |
निर्यात्युपान्तसरसीकमलोदरेभ्यः	Niryaatyupaantasaraseekamalodarebhyah
शेषाद्रिशेखरविभो तव सुप्रभातम्॥ १०॥	Sheshaadrishekharavibho tava suprabhaatam|| 10||
योषागणेन वरदध्नि विमथ्यमाने	Yoshaaganena varadadhni vimathyamaane
घोषालयेषु दधिमन्थनतीव्रघोषाः ।	Ghoshaalayeshu dadhimanthanateevraghoshaah |
रोषात्कलिं विदधते ककुभश्च कुम्भाः	Roshaatkalim vidadhate kakubhashcha kumbhaah
शेषाद्रिशेखरविभो तव सुप्रभातम्॥ ११॥	Sheshaadrishekharavibho tava suprabhaatam|| 11||
पद्मेशमित्रशतपत्रगतालिवर्गाः	Padmeshamitrashatapatragataalivargaah
हर्तुं श्रियं कुवलयस्य निजाङ्गलक्ष्म्या ।	Hartum shriyam kuvalayasya nijaanggalakshmyaa |
भेरीनिनादमिव बिभ्रति तीव्रनादं	Bhereeninaadamiva bibhrati teevranaadam
शेषाद्रिशेखरविभो तव सुप्रभातम्॥ १२॥	Sheshaadrishekharavibho tava suprabhaatam|| 12||
श्रीमन्नभीष्टवरदाखिललोकबन्धो	Shreemannabheeshtavaradaakhilalokabandho
श्रीश्रीनिवास जगदेकदयैकसिन्धो ।	Shreeshreenivaasa jagadekadayaikasindho |
श्रीदेवतागृहभुजान्तर दिव्यमूर्ते	Shreedevataagrihabhujaantara divyamoorte
श्रीवेङ्कटाचलपते तव सुप्रभातम्॥ १३॥	Shreevengkataachalapate tava suprabhaatam|| 13||
श्रीस्वामिपुष्करिणिकाऽऽप्लवनिर्मलाङ्गाः	Shreesvaamipushkarinikaa''plavanirmalaanggaah
श्रेयोऽर्थिनो हरविरिञ्चिसनन्दनाद्याः ।	Shreyo'rthino haravirinychisanandanaadyaah |
द्वारे वसन्ति वरवेत्रहतोत्तमाङ्गाः	Dvaare vasanti varavetrahatottamaanggaah
श्रीवेङ्कटाचलपते तव सुप्रभातम्॥ १४॥	Shreevengkataachalapate tava suprabhaatam|| 14||
श्रीशेषशैलगरुडाचलवेङ्कटाद्रि	Shreesheshashailagarudaachalavengkataadri
नारायणाद्रिवृषभाद्रिवृषाद्रिमुख्याम्।	Naaraayanaadrivrishabhaadrivrishaadrimukhyaam|
आख्यां त्वदीयवसतेरनिशं वदन्ति	Aakhyaam tvadeeyavasateranisham vadanti
श्रीवेङ्कटाचलपते तव सुप्रभातम्॥ १५॥	Shreevengkataachalapate tava suprabhaatam|| 15||
सेवापराः शिवसुरेशकृशानुधर्म-	Sevaaparaah shivasureshakrishaanudharma-
रक्षोऽम्बुनाथपवमानधनाधिनाथाः ।	Raksho'mbunaathapavamaanadhanaadhinaathaah |
बद्धाञ्जलिप्रविलसन्निजशीर्षदेशाः	Baddhaanyjalipravilasannijasheershadeshaah
श्रीवेङ्कटाचलपते तव सुप्रभातम्॥ १६॥	Shreevengkataachalapate tava suprabhaatam|| 16||
धाटीषु ते विहगराजमृगाधिराज-	Dhaateeshu te vihagaraajamrigaadhiraaja-
नागाधिराजगजराजहयाधिराजाः ।	Naagaadhiraajagajaraajahayaadhiraajaah |
स्वस्वाधिकारमहिमाधिकमर्थयन्ते	Svasvaadhikaaramahimaadhikamarthayante
श्रीवेङ्कटाचलपते तव सुप्रभातम्॥ १७॥	Shreevengkataachalapate tava suprabhaatam|| 17||
सूर्येन्दुभौमबुधवाक्पतिकाव्यसौरि-	Sooryendubhaumabudhavaakpatikaavyasauri-
स्वर्भानुकेतुदिविषत्परिषत्प्रधानाः ।	Svarbhaanuketudivishatparishatpradhaanaah |
त्वद्दासदासचरमावधिदासदासाः	Tvaddaasadaasacharamaavadhidaasadaasaah
श्रीवेङ्कटाचलपते तव सुप्रभातम्॥ १८॥	Shreevengkataachalapate tava suprabhaatam|| 18||
त्वत्पादधूलिभरितस्फुरितोत्तमाङ्गाः	Tvatpaadadhoolibharitasphuritottamaanggaah
स्वर्गापवर्गनिरपेक्षनिजान्तरङ्गाः ।	Svargaapavarganirapekshanijaantaranggaah |
कल्पागमाकलनयाऽऽकुलतां लभन्ते	Kalpaagamaakalanayaa''kulataam labhante
श्रीवेङ्कटाचलपते तव सुप्रभातम्॥ १९॥	Shreevengkataachalapate tava suprabhaatam|| 19||
त्वद्गोपुराग्रशिखराणि निरीक्षमाणाः	Tvadgopuraagrashikharaani nireekshamaanaah
स्वर्गापवर्गपदवीं परमां श्रयन्तः ।	Svargaapavargapadaveem paramaam shrayantah |
मर्त्या मनुष्यभुवने मतिमाश्रयन्ते	Martyaa manushyabhuvane matimaashrayante
श्रीवेङ्कटाचलपते तव सुप्रभातम्॥ २०॥	Shreevengkataachalapate tava suprabhaatam|| 20||
श्रीभूमिनायक दयादिगुणामृताब्धे	Shreebhoominaayaka dayaadigunaamritaabdhe
देवाधिदेव जगदेकशरण्यमूर्ते ।	Devaadhideva jagadekasharanyamoorte |
श्रीमन्ननन्तगरुडादिभिरर्चिताङ्घ्रे	Shreemannanantagarudaadibhirarchitaangghre
श्रीवेङ्कटाचलपते तव सुप्रभातम्॥ २१॥	Shreevengkataachalapate tava suprabhaatam|| 21||
श्रीपद्मनाभ पुरुषोत्तम वासुदेव	Shreepadmanaabha purushottama vaasudeva
वैकुण्ठ माधव जनार्दन चक्रपाणे ।	Vaikuntha maadhava janaardana chakrapaane |
श्रीवत्सचिह्न शरणागतपारिजात	Shreevatsachihna sharanaagatapaarijaata
श्रीवेङ्कटाचलपते तव सुप्रभातम्॥ २२॥	Shreevengkataachalapate tava suprabhaatam|| 22||
कन्दर्पदर्पहरसुन्दरदिव्यमूर्ते	Kandarpadarpaharasundaradivyamoorte
कान्ताकुचाम्बुरुहकुड्मललोलदृष्टे ।	Kaantaakuchaamburuhakudmalaloladrishte |
कल्याणनिर्मलगुणाकरदिव्यकीर्ते	Kalyaananirmalagunaakaradivyakeerte
श्रीवेङ्कटाचलपते तव सुप्रभातम्॥ २३॥	Shreevengkataachalapate tava suprabhaatam|| 23||
मीनाकृते कमठकोलनृसिंहवर्णिन्	Meenaakrite kamathakolanrisimhavarnin
स्वामिन्परश्वधतपोधन रामचन्द्र ।	Svaaminparashvadhatapodhana raamachandra |
शेषांशराम यदुनन्दन कल्किरूप	Sheshaamsharaama yadunandana kalkiroopa
श्रीवेङ्कटाचलपते तव सुप्रभातम्॥ २४॥	Shreevengkataachalapate tava suprabhaatam|| 24||
एलालवङ्गघनसारसुगन्धितीर्थं	Elaalavanggaghanasaarasugandhiteertham
दिव्यं वियत्सरिति हेमघटेषु पूर्णम्।	Divyam viyatsariti hemaghateshu poornam|
धृत्वाऽऽद्य वैदिकशिखामणयः प्रहृष्टाः	Dhritvaa''dya vaidikashikhaamanayah prahrishtaah
तिष्ठन्ति वेङ्कटपते तव सुप्रभातम्॥ २५॥	Tishthanti vengkatapate tava suprabhaatam|| 25||
भास्वानुदेति विकचानि सरोरुहाणि	Bhaasvaanudeti vikachaani saroruhaani
सम्पूरयन्ति निनदैः ककुभो विहङ्गाः ।	Sampoorayanti ninadaih kakubho vihanggaah |
श्रीवैष्णवास्सततमर्थितमङ्गलास्ते	Shreevaishnavaassatatamarthitamanggalaaste
धामाश्रयन्ति तव वेङ्कट सुप्रभातम्॥ २६॥	Dhaamaashrayanti tava vengkata suprabhaatam|| 26||
ब्रह्मादयस्सुरवरास्समहर्षयस्ते	Brahmaadayassuravaraassamaharshayaste
सन्तस्सनन्दनमुखास्त्वथ योगिवर्याः ।	Santassanandanamukhaastvatha yogivaryaah |
धामान्तिके तव हि मङ्गलवस्तुहस्ताः	Dhaamaantike tava hi manggalavastuhastaah
श्रीवेङ्कटाचलपते तव सुप्रभातम्॥ २७॥	Shreevengkataachalapate tava suprabhaatam|| 27||
लक्ष्मीनिवास निरवद्यगुणैकसिन्धो	Lakshmeenivaasa niravadyagunaikasindho
संसारसागरसमुत्तरणैकसेतो ।	Samsaarasaagarasamuttaranaikaseto |
वेदान्तवेद्य निजवैभव भक्तभोग्य	Vedaantavedya nijavaibhava bhaktabhogya
श्रीवेङ्कटाचलपते तव सुप्रभातम्॥ २८॥	Shreevengkataachalapate tava suprabhaatam|| 28||
इत्थं वृषाचलपतेरिह सुप्रभातम्	Ittham vrishaachalapateriha suprabhaatam
ये मानवाः प्रतिदिनं पठितुं प्रवृत्ताः ।	Ye maanavaah pratidinam pathitum pravrittaah |
तेषां प्रभातसमये स्मृतिरङ्गभाजां	Teshaam prabhaatasamaye smritiranggabhaajaam
प्रज्ञां परार्थसुलभां परमां प्रसूते ॥ २९॥	Prajnyaam paraarthasulabhaam paramaam prasoote || 29||
॥ इति वेङ्कटेशसुप्रभातम्॥	|| iti vengkateshasuprabhaatam||
अथ वेङ्कटेशस्तोत्रम्।	Atha vengkateshastotram|
कमलाकुचचूचुककुङ्कुमतो	Kamalaakuchachoochukakungkumato
नियतारुणितातुलनीलतनो ।	Niyataarunitaatulaneelatano |
कमलायतलोचन लोकपते	Kamalaayatalochana lokapate
विजयी भव वेङ्कटशैलपते ॥ १॥	Vijayee bhava vengkatashailapate || 1||
सचतुर्मुखषण्मुखपञ्चमुख-	Sachaturmukhashanmukhapanychamukha-
प्रमुखाखिलदैवतमौलिमणे ।	Pramukhaakhiladaivatamaulimane |
शरणागतवत्सल सारनिधे	Sharanaagatavatsala saaranidhe
परिपालय मां वृषशैलपते ॥ २॥	Paripaalaya maam vrishashailapate || 2||
अतिवेलतया तव दुर्विषहैः	Ativelatayaa tava durvishahaih
अनुवेलकृतैरपराधशतैः ।	Anuvelakritairaparaadhashataih |
भरितं त्वरितं वृषशैलपते	Bharitam tvaritam vrishashailapate
परया कृपया परिपाहि हरे ॥ ३॥	Parayaa kripayaa paripaahi hare || 3||
अधिवेङ्कटशैलमुदारमते-	Adhivengkatashailamudaaramate-
र्जनताभिमताधिकदानरतात्।	Rjanataabhimataadhikadaanarataat|
परदेवतया गदितान्निगमैः	Paradevatayaa gaditaannigamaih
कमलादयितान्न परं कलये ॥ ४॥	Kamalaadayitaanna param kalaye || 4||
कलवेणुरवावशगोपवधू-	Kalavenuravaavashagopavadhoo-
शतकोटिवृतात्स्मरकोटिसमात्।	Shatakotivritaatsmarakotisamaat|
प्रतिवल्लविकाभिमतात्सुखदात्	Prativallavikaabhimataatsukhadaat
वसुदेवसुतान्न परं कलये ॥ ५॥	Vasudevasutaanna param kalaye || 5||
अभिरामगुणाकर दाशरथे	Abhiraamagunaakara daasharathe
जगदेकधनुर्धर धीरमते ।	Jagadekadhanurdhara dheeramate |
रघुनायक राम रमेश विभो	Raghunaayaka raama ramesha vibho
वरदो भव देव दयाजलधे ॥ ६॥	Varado bhava deva dayaajaladhe || 6||
अवनीतनयाकमनीयकरं	Avaneetanayaakamaneeyakaram
रजनीकरचारुमुखाम्बुरुहम्।	Rajaneekarachaarumukhaamburuham|
रजनीचरराजतमोमिहिरं	Rajaneechararaajatamomihiram
महनीयमहं रघुराममये ॥ ७॥	Mahaneeyamaham raghuraamamaye || 7||
सुमुखं सुहृदं सुलभं सुखदं	Sumukham suhridam sulabham sukhadam
स्वनुजं च सुकायममोघशरम्।	Svanujam cha sukaayamamoghasharam|
अपहाय रघूद्वहमन्यमहं	Apahaaya raghoodvahamanyamaham
न कथञ्चन कञ्चन जातु भजे ॥ ८॥	Na kathanychana kanychana jaatu bhaje || 8||
विना वेङ्कटेशं न नाथो न नाथः	Vinaa vengkatesham na naatho na naathah
सदा वेङ्कटेशं स्मरामि स्मरामि ।	Sadaa vengkatesham smaraami smaraami |
हरे वेङ्कटेश प्रसीद प्रसीद	Hare vengkatesha praseeda praseeda
प्रियं वेङ्कटेश प्रयच्छ प्रयच्छ ॥ ९॥	Priyam vengkatesha prayachchha prayachchha || 9||
अहं दूरतस्ते पदाम्भोजयुग्म-	Aham doorataste padaambhojayugma-
प्रणामेच्छयाऽऽगत्य सेवां करोमि ।	Pranaamechchhayaa''gatya sevaam karomi |
सकृत्सेवया नित्यसेवाफलं त्वं	Sakritsevayaa nityasevaaphalam tvam
प्रयच्छ प्रयच्छ प्रभो वेङ्कटेश ॥ १०॥	Prayachchha prayachchha prabho vengkatesha || 10||
अज्ञानिना मया दोषान्अशेषान्विहितान्हरे ।	Ajnyaaninaa mayaa doshaanasheshaanvihitaanhare |
क्षमस्व त्वं क्षमस्व त्वं शेषशैलशिखामणे ॥ ११॥	Kshamasva tvam kshamasva tvam sheshashailashikhaamane || 11||
॥ इति वेङ्कटेशस्तोत्रम्॥	|| iti vengkateshastotram||
अथ वेङ्कटेशप्रपत्ति ।	Atha vengkateshaprapatti |
ईशानां जगतोऽस्य वेङ्कटपतेर्विष्णोः परां प्रेयसीं	Eeshaanaam jagato'sya vengkatapatervishnoh paraam preyaseem
तद्वक्षस्स्थलनित्यवासरसिकां तत्क्षान्तिसंवर्धिनीम्।	Tadvakshassthalanityavaasarasikaam tatkshaantisamvardhineem|
पद्मालङ्कृतपाणिपल्लवयुगां पद्मासनस्थां श्रियं	Padmaalangkritapaanipallavayugaam padmaasanasthaam shriyam
वात्सल्यादिगुणोज्ज्वलां भगवतीं वन्दे जगन्मातरम्॥ १॥	Vaatsalyaadigunojjvalaam bhagavateem vande jaganmaataram|| 1||
श्रीमन्कृपाजलनिधे कृतसर्वलोक	Shreemankripaajalanidhe kritasarvaloka
सर्वज्ञ शक्त नतवत्सल सर्वशेषिन्।	Sarvajnya shakta natavatsala sarvasheshin|
स्वामिन्सुशील सुलभाश्रितपारिजात	Svaaminsusheela sulabhaashritapaarijaata
श्रीवेङ्कटेशचरणौ शरणं प्रपद्ये ॥ २॥	Shreevengkateshacharanau sharanam prapadye || 2||
आनूपुरार्पितसुजातसुगन्धिपुष्प-	Aanoopuraarpitasujaatasugandhipushpa-
सौरभ्यसौरभकरौ समसन्निवेशौ ।	Saurabhyasaurabhakarau samasanniveshau |
सौम्यौ सदाऽनुभवनेऽपि नवानुभाव्यौ	Saumyau sadaa'nubhavane'pi navaanubhaavyau
श्रीवेङ्कटेशचरणौ शरणं प्रपद्ये ॥ ३॥	Shreevengkateshacharanau sharanam prapadye || 3||
सद्योविकासिसमुदित्वरसान्द्रराग-	Sadyovikaasisamuditvarasaandraraaga-
सौरभ्यनिर्भरसरोरुहसाम्यवार्ताम्।	Saurabhyanirbharasaroruhasaamyavaartaam|
सम्यक्षु साहसपदेषु विलेखयन्तौ	Samyakshu saahasapadeshu vilekhayantau
श्रीवेङ्कटेशचरणौ शरणं प्रपद्ये ॥ ४॥	Shreevengkateshacharanau sharanam prapadye || 4||
रेखामयध्वजसुधाकलशातपत्र	Rekhaamayadhvajasudhaakalashaatapatra
वज्राङ्कुशाम्बुरुहकल्पकशङ्खचक्रैः ।	Vajraangkushaamburuhakalpakashangkhachakraih |
भव्यैरलङ्कृततलौ परतत्त्वचिन्हैः	Bhavyairalangkritatalau paratattvachinhaih
श्रीवेङ्कटेशचरणौ शरणं प्रपद्ये ॥ ५॥	Shreevengkateshacharanau sharanam prapadye || 5||
ताम्रोदरद्युतिपराजितपद्मरागौ	Taamrodaradyutiparaajitapadmaraagau
बाह्यैर्महोभिरभिभूतमहेन्द्रनीलौ ।	Baahyairmahobhirabhibhootamahendraneelau |
उद्यन्नखांशुभिरुदस्तशशाङ्कभासौ	Udyannakhaamshubhirudastashashaangkabhaasau
श्रीवेङ्कटेशचरणौ शरणं प्रपद्ये ॥ ६॥	Shreevengkateshacharanau sharanam prapadye || 6||
सप्रेमभीति कमलाकरपल्लवाभ्यां	Sapremabheeti kamalaakarapallavaabhyaam
संवाहनेऽपि सपदि क्लममादधानौ ।	Samvaahane'pi sapadi klamamaadadhaanau |
कान्ताववाङ्ग्मनसगोचरसौकुमार्यौ	Kaantaavavaanggmanasagocharasaukumaaryau
श्रीवेङ्कटेशचरणौ शरणं प्रपद्ये ॥ ७॥	Shreevengkateshacharanau sharanam prapadye || 7||
लक्ष्मीमहीतदनुरूपनिजानुभाव-	Lakshmeemaheetadanuroopanijaanubhaava-
नीलादिदिव्यमहिषीकरपल्लवानाम्।	Neelaadidivyamahisheekarapallavaanaam|
आरुण्यसङ्क्रमणतः किल सान्द्ररागौ	Aarunyasangkramanatah kila saandraraagau
श्रीवेङ्कटेशचरणौ शरणं प्रपद्ये ॥ ८॥	Shreevengkateshacharanau sharanam prapadye || 8||
नित्यानमद्विधिशिवादिकिरीटकोटि-	Nityaanamadvidhishivaadikireetakoti-
प्रत्युप्तदीप्तनवरत्नमहःप्ररोहैः ।	Pratyuptadeeptanavaratnamahahprarohaih |
नीराजनाविधिमुदारमुपादधानौ	Neeraajanaavidhimudaaramupaadadhaanau
श्रीवेङ्कटेशचरणौ शरणं प्रपद्ये ॥ ९॥	Shreevengkateshacharanau sharanam prapadye || 9||
विष्णोः पदे परम इत्युदितप्रशंसौ	Vishnoh pade parama ityuditaprashamsau
यौ मध्व उत्स इति भोग्यतयाऽप्युपात्तौ ।	Yau madhva utsa iti bhogyatayaa'pyupaattau |
भूयस्तथेति तव पाणितलप्रदिष्टौ	Bhooyastatheti tava paanitalapradishtau
श्रीवेङ्कटेशचरणौ शरणं प्रपद्ये ॥ १०॥	Shreevengkateshacharanau sharanam prapadye || 10||
पार्थाय तत्सदृशसारथिना त्वयैव	Paarthaaya tatsadrishasaarathinaa tvayaiva
यौ दर्शितौ स्वचरणौ शरणं व्रजेति ।	Yau darshitau svacharanau sharanam vrajeti |
भूयोऽपि मह्यमिह तौ करदर्शितौ ते	Bhooyo'pi mahyamiha tau karadarshitau te
श्रीवेङ्कटेशचरणौ शरणं प्रपद्ये ॥ ११॥	Shreevengkateshacharanau sharanam prapadye || 11||
मन्मूर्ध्नि कालियफणे विकटाटवीषु	Manmoordhni kaaliyaphane vikataataveeshu
श्रीवेङ्कटाद्रिशिखरे शिरसि श्रुतीनाम्।	Shreevengkataadrishikhare shirasi shruteenaam|
चित्तेऽप्यनन्यमनसां सममाहितौ ते	Chitte'pyananyamanasaam samamaahitau te
श्रीवेङ्कटेशचरणौ शरणं प्रपद्ये ॥ १२॥	Shreevengkateshacharanau sharanam prapadye || 12||
अम्लानहृष्यदवनीतलकीर्णपुष्पौ	Amlaanahrishyadavaneetalakeernapushpau
श्रीवेङ्कटाद्रिशिखराभरणायमानौ ।	Shreevengkataadrishikharaabharanaayamaanau |
आनन्दिताखिलमनोनयनौ तवैतौ	Aananditaakhilamanonayanau tavaitau
श्रीवेङ्कटेशचरणौ शरणं प्रपद्ये ॥ १३॥	Shreevengkateshacharanau sharanam prapadye || 13||
प्रायः प्रपन्नजनताप्रथमावगाह्यौ	Praayah prapannajanataaprathamaavagaahyau
मातुस्स्तनाविव शिशोरमृतायमानौ ।	Maatusstanaaviva shishoramritaayamaanau |
प्राप्तौ परस्परतुलामतुलान्तरौ ते	Praaptau parasparatulaamatulaantarau te
श्रीवेङ्कटेशचरणौ शरणं प्रपद्ये ॥ १४॥	Shreevengkateshacharanau sharanam prapadye || 14||
सत्त्वोत्तरैस्सततसेव्यपदाम्बुजेन	Sattvottaraissatatasevyapadaambujena
संसारतारकदयार्द्र दृगञ्चलेन ।	Samsaarataarakadayaardra driganychalena |
सौम्योपयन्तृमुनिना मम दर्शितौ ते	Saumyopayantrimuninaa mama darshitau te
श्रीवेङ्कटेशचरणौ शरणं प्रपद्ये ॥ १५॥	Shreevengkateshacharanau sharanam prapadye || 15||
श्रीश श्रिया घटिकया त्वदुपायभावे	Shreesha shriyaa ghatikayaa tvadupaayabhaave
प्राप्ये त्वयि स्वयमुपेयतया स्फुरन्त्या ।	Praapye tvayi svayamupeyatayaa sphurantyaa |
नित्याश्रिताय निरवद्यगुणाय तुभ्यं	Nityaashritaaya niravadyagunaaya tubhyam
स्यां किङ्करो वृषगिरीश न जातु मह्यम्॥ १६॥	Syaam kingkaro vrishagireesha na jaatu mahyam|| 16||
॥ इति वेङ्कटेशप्रपत्ति ॥	|| iti vengkateshaprapatti ||
अथ वेङ्कटेशमङ्गलाशासनम्।	Atha vengkateshamanggalaashaasanam|
श्रियः कान्ताय कल्याणनिधये निधयेऽर्थिनां	Shriyah kaantaaya kalyaananidhaye nidhaye'rthinaam
श्रीवेङ्कटनिवासाय श्रीनिवासाय मङ्गलम्॥ १॥	Shreevengkatanivaasaaya shreenivaasaaya manggalam|| 1||
लक्ष्मी सविभ्रमालोकसुभ्रूविभ्रमचक्षुषे	Lakshmee savibhramaalokasubhroovibhramachakshushe
चक्षुषे सर्वलोकानां वेङ्कटेशाय मङ्गलम्॥ २॥	Chakshushe sarvalokaanaam vengkateshaaya manggalam|| 2||
श्रीवेङ्कटाद्रिशृङ्गाङ्ग्रमङ्गलाभरणाङ्घ्रये	Shreevengkataadrishringgaanggramanggalaabharanaangghraye
मङ्गलानां निवासाय श्रीनिवासाय मङ्गलम्॥ ३॥	Manggalaanaam nivaasaaya shreenivaasaaya manggalam|| 3||
सर्वावयवसौन्दर्यसम्पदा सर्वचेतसां	Sarvaavayavasaundaryasampadaa sarvachetasaam
सदा सम्मोहनायास्तु वेङ्कटेशाय मङ्गलम्॥ ४॥	Sadaa sammohanaayaastu vengkateshaaya manggalam|| 4||
नित्याय निरवद्याय सत्यानन्दचिदात्मने	Nityaaya niravadyaaya satyaanandachidaatmane
सर्वान्तरात्मने श्रीमद्वेङ्कटेशाय मङ्गलम्॥ ५॥	Sarvaantaraatmane shreemadvengkateshaaya manggalam|| 5||
स्वतस्सर्वविदे सर्वशक्तये सर्वशेषिणे	Svatassarvavide sarvashaktaye sarvasheshine
सुलभाय सुशीलाय वेङ्कटेशाय मङ्गलम्॥ ६॥	Sulabhaaya susheelaaya vengkateshaaya manggalam|| 6||
परस्मै ब्रह्मणे पूर्णकामाय परमात्मने	Parasmai brahmane poornakaamaaya paramaatmane
प्रयुञ्जे परतत्त्वाय वेङ्कटेशाय मङ्गलम्॥ ७॥	Prayunyje paratattvaaya vengkateshaaya manggalam|| 7||
आकालतत्त्वमश्रान्तं आत्मनामनुपश्यतां	Aakaalatattvamashraantam aatmanaamanupashyataam
अतृप्त्यमृतरूपाय वेङ्कटेशाय मङ्गलम्॥ ८॥	Atriptyamritaroopaaya vengkateshaaya manggalam|| 8||
प्रायस्स्वचरणौ पुंसां शरण्यत्वेन पाणिना	Praayassvacharanau pumsaam sharanyatvena paaninaa
कृपयाऽऽदिशते श्रीमद्वेङ्कटेशाय मङ्गलम्॥ ९॥	Kripayaa''dishate shreemadvengkateshaaya manggalam|| 9||
दयामृत तरङ्गिण्यास्तरङ्गैरिव शीतलैः	Dayaamrita tarangginyaastaranggairiva sheetalaih
अपाङ्गैः सिञ्चते विश्वं वेङ्कटेशाय मङ्गलम्॥ १०॥	Apaanggaih sinychate vishvam vengkateshaaya manggalam|| 10||
स्रग्भूषाम्बरहेतीनां सुषमावहमूर्तये	Sragbhooshaambaraheteenaam sushamaavahamoortaye
सर्वार्तिशमनायास्तु वेङ्कटेशाय मङ्गलम्॥ ११॥	Sarvaartishamanaayaastu vengkateshaaya manggalam|| 11||
श्रीवैकुण्ठविरक्ताय स्वामिपुष्करिणीतटे	Shreevaikunthaviraktaaya svaamipushkarineetate
रमया रममाणाय वेङ्कटेशाय मङ्गलम्॥ १२॥	Ramayaa ramamaanaaya vengkateshaaya manggalam|| 12||
श्रीमत्सुन्दरजामातृमुनिमानसवासिने	Shreematsundarajaamaatrimunimaanasavaasine
सर्वलोकनिवासाय श्रीनिवासाय मङ्गलम्॥ १३॥	Sarvalokanivaasaaya shreenivaasaaya manggalam|| 13||
मङ्गलाशासनपरैर्मदाचार्य पुरोगमैः	Manggalaashaasanaparairmadaachaarya purogamaih
सर्वैश्च पूर्वैराचार्यैः सत्कृतायास्तु मङ्गलम्॥ १४॥	Sarvaishcha poorvairaachaaryaih satkritaayaastu manggalam|| 14||
॥ इति वेङ्कटेशमङ्गलाशासनम्॥	|| iti vengkateshamanggalaashaasanam||
॥ ॐ तत्सत्॥	|| Om tatsat||

In English (Diya prayer library): A traditional morning recitation for Lord Venkateswara, including Suprabhatam, Stotram, Prapatti, and Mangalashasanam.

You can read Sri Venkateswara Suprabhatam in Diya. For related practice, see how to choose a morning prayer and morning or evening puja.

Related reading

• Prayers and mantras
• How to choose a morning prayer
• Morning or evening puja
• About the Diya app